Audet facundo qui carmina mittere Neruae,
Pallida donabit glaucina, Cosme, tibi,
Paestano uiolas et cana ligustra colono,
Hyblaeis apibus Corsica mella dabit:
5
Sed tamen et paruae nonnulla est gratia Musae;
Appetitur posito uilis oliua lupo.
Nec tibi sit mirum modici quod conscia uatis
Iudicium metuit nostra Thalia tuum:
Ipse tuas etiam ueritus Nero dicitur aures,
10
Lasciuum iuuenis cum tibi lusit opus.