Haec, quae tota patet tegiturque et marmore et auro,
Infantis domini conscia terra fuit,
Felix o, quantis sonuit uagitibus et quas
Vidit reptantis sustinuitque manus:
5
Hic steterat ueneranda domus quae praestitit orbi
Quod Rhodos astrifero, quod pia Creta polo.
Curetes texere Iouem crepitantibus armis,
Semiuiri poterant qualia ferre Phryges:
At te protexit superum pater et tibi, Caesar,
10
Pro iaculo et parma fulmen et aegis erat.