Phosphore, redde diem: quid gaudia nostra moraris?
Caesare uenturo, Phosphore, redde diem.
Roma rogat. placidi numquid te pigra Bootae
Plaustra uehunt, lento quod nimis axe uenis?
5
Ledaeo poteras abducere Cyllaron astro:
Ipse suo cedet nunc tibi Castor equo.
Quid cupidum Titana tenes? iam Xanthus et Aethon
Frena uolunt, uigilat Memnonis alma parens.
Tarda tamen nitidae non cedunt sidera luci,
10
Et cupit Ausonium luna uidere ducem.
Iam, Caesar, uel nocte ueni: stent astra licebit,
Non derit populo te ueniente dies.