Si tua, Cerrini, promas epigrammata uulgo,
Vel mecum possis uel prior ipse legi:
Sed tibi tantus inest ueteris respectus amici
Carior ut mea sit quam tua fama tibi.
5
Sic Maro nec Calabri temptauit carmina Flacci,
Pindaricos nosset cum superare modos,
Et Vario cessit Romani laude cothurni,
Cum posset tragico fortius ore loqui.
Aurum et opes et rura frequens donabit amicus:
10
Qui uelit ingenio cedere rarus erit.