Martialis epigrammata 8, 3

Testo base di riferimento: W. M. Lindsay, 1929

Cura dell'edizione digitale: A. Fusi, 2010

Altre sezioni


"Quinque satis fuerant: nam sex septemue libelli

      Est nimium: quid adhuc ludere, Musa, iuuat?

Sit pudor et finis: iam plus nihil addere nobis

     Fama potest: teritur noster ubique liber;

5

Et cum rupta situ Messalae saxa iacebunt

     Altaque cum Licini marmora puluis erunt,

Me tamen ora legent et secum plurimus hospes

      Ad patrias sedes carmina nostra feret".

Finieram, cum sic respondit nona sororum,

10

      Cui coma et unguento sordida uestis erat:

"Tune potes dulcis, ingrate, relinquere nugas?

      Dic mihi, quid melius desidiosus ages?

An iuuat ad tragicos soccum transferre cothurnos

      Aspera uel paribus bella tonare modis,

15

Praelegat ut tumidus rauca te uoce magister

      Oderit et grandis uirgo bonusque puer?

Scribant ista graues nimium nimiumque seueri,

      Quos media miseros nocte lucerna uidet.

At tu Romano lepidos sale tinge libellos:

20

      Adgnoscat mores uita legatque suos.

Angusta cantare licet uidearis auena,

     Dum tua multorum uincat auena tubas".

4

teritur T β

poterit γ