Fertur habere meos, si uera est fama, libellos
Inter delicias pulchra Vienna suas.
Me legit omnis ibi senior iuuenisque puerque
Et coram tetrico casta puella uiro.
5
Hoc ego maluerim quam si mea carmina cantent
Qui Nilum ex ipso protinus ore bibunt;
Quam meus Hispano si me Tagus impleat auro
Pascat et Hybla meas, pascat Hymettos apes.
Non nihil ergo sumus nec blandae munere linguae
10
Decipimur: credam iam, puto, Lause, tibi.