Qui tonsor fueras tota notissimus urbe
Et post hoc dominae munere factus eques,
Sicanias urbes Aetnaeaque regna petisti,
Cinname, cum fugeres tristia iura fori.
5
Qua nunc arte graues tolerabis inutilis annos?
Quid facit infelix et fugitiua quies?
Non rhetor, non grammaticus ludiue magister,
Non Cynicus, non tu Stoicus esse potes,
Vendere nec uocem Siculis plausumque theatris:
10
Quod superest, iterum, Cinname, tonsor eris.