Martialis epigrammata 7, 51

Testo base di riferimento: W. M. Lindsay, 1929

Cura dell'edizione digitale: A. Fusi, 2010

Altre sezioni


Mercari nostras si te piget, Vrbice, nugas

      Et lasciua tamen carmina nosse libet,

Pompeium quaeres- et nosti forsitan- Auctum;

      Vltoris prima Martis in aede sedet:

5

Iure madens uarioque togae limatus in usu

      Non lector meus hic, Vrbice, sed liber est.

Sic tenet absentes nostros cantatque libellos

      Vt pereat chartis littera nulla meis:

Denique, si uellet, poterat scripsisse uideri;

10

      Sed famae mauult ille fauere meae.

Hunc licet a decima- neque enim satis ante uacabit-

      Sollicites, capiet cenula parua duos;

Ille leget, bibe tu; nolis licet, ille sonabit:

      Et cum "iam satis est" dixeris, ille leget.