Doctorum Licini celeberrime Sura uirorum,
Cuius prisca grauis lingua reduxit auos,
Redderis- heu, quanto fatorum munere!- nobis
Gustata Lethes paene remissus aqua.
5
Perdiderant iam uota metum securaque flebat
Tristitia et lacrimis iamque peractus eras:
Non tulit inuidiam taciti regnator Auerni
Et ruptas Fatis reddidit ipse colus.
Scis igitur quantas hominum mors falsa querelas
10
Mouerit et frueris posteritate tua.
Viue uelut rapto fugitiuaque gaudia carpe
Perdiderit nullum uita reuersa diem.
1
Sura β
summe γ