Martialis epigrammata 7, 28

Testo base di riferimento: W. M. Lindsay, 1929

Cura dell'edizione digitale: A. Fusi, 2010

Altre sezioni


Sic Tiburtinae crescat tibi silua Dianae

      Et properet caesum saepe redire nemus,

Nec Tartesiacis Pallas tua, Fusce, trapetis

      Cedat et immodici dent bona musta lacus;

5

Sic fora mirentur, sic te Palatia laudent,

      Excolat et geminas plurima palma fores:

Otia dum medius praestat tibi parua December,

      Exige, sed certa, quos legis, aure iocos.

"Scire libet uerum? res est haec ardua". sed tu

10

      Quod tibi uis dici dicere, Fusce, potes.