Tuscae glandis aper populator et ilice multa
Iam piger, Aetolae fama secunda ferae,
Quem meus intrauit splendenti cuspide Dexter,
Praeda iacet nostris inuidiosa focis.
5
Pinguescant madido laeti nidore penates
Flagret et exciso festa culina iugo.
Sed cocus ingentem piperis consumet aceruum
Addet et arcano mixta Falerna garo:
Ad dominum redeas, noster te non capit ignis,
10
Conturbator aper: uilius esurio.