Martialis epigrammata 7, 20

Testo base di riferimento: W. M. Lindsay, 1929

Cura dell'edizione digitale: A. Fusi, 2010

Altre sezioni


Nihil est miserius neque gulosius Santra.

Rectam uocatus cum cucurrit ad cenam,

Quam tot diebus noctibusque captauit,

Ter poscit apri glandulas, quater lumbum

5

Et utramque coxam leporis et duos armos,

Nec erubescit peierare de turdo

Et ostreorum rapere liuidos cirros.

Buccis placentae sordidam linit mappam;

Illic et uuae collocantur ollares

10

Et Punicorum pauca grana malorum

Et excauatae pellis indecens uuluae

Et lippa ficus debilisque boletus.

Sed mappa cum iam mille rumpitur furtis,

Rosos tepenti spondylos sinu condit

15

Et deuorato capite turturem truncum.

Colligere longa turpe nec putat dextra

Analecta quidquid et canes reliquerunt.

Nec esculenta sufficit gulae praeda,

Mixto lagonam replet ad pedes uino.

20

Haec per ducentas cum domum tulit scalas

Seque obserata clusit anxius cella

Gulosus ille, postero die uendit.

2

cucurrit ς

currit β γ