Quidam me modo, Rufe, diligenter
Inspectum, uelut emptor aut lanista,
Cum uultu digitoque subnotasset,
"Tune es, tune" ait "ille Martialis,
5
Cuius nequitias iocosque nouit
Aurem qui modo non habet Batauam"?
Subrisi modice, leuique nutu
Me quem dixerat esse non negaui.
"Cur ergo" inquit "habes malas lacernas"?
10
Respondi: "Quia sum malus poeta".
Hoc ne saepius accidat poetae,
Mittas, Rufe, mihi bonas lacernas.
6
habet Batauam γ
habebat auam β