Flete nefas uestrum sed toto flete Lucrino,
Naides, et luctus sentiat ipsa Thetis.
Inter Baianas raptus puer occidit undas
Eutychos ille, tuum, Castrice, dulce latus.
5
Hic tibi curarum socius blandumque leuamen,
Hic amor, hic nostri uatis Alexis erat.
Numquid te uitreis nudum lasciua sub undis
Vidit et Alcidae nympha remisit Hylan?
An dea femineum iam neglegit Hermaphroditum
10
Amplexu teneri sollicitata uiri?
Quidquid id est, subitae quaecumque est causa rapinae,
Sit, precor, et tellus mitis et unda tibi.