Martialis epigrammata 6, 64

Reference basis text: W. M. Lindsay, 1929

Editing of the digital edition: A. Fusi, 2010

Other sections


Cum sis nec rigida Fabiorum gente creatus

Nec qualem Curio, dum prandia portat aranti,

Hirsuta peperit rubicunda sub ilice coniunx,

Sed patris ad speculum tonsi matrisque togatae

5

Filius et possit sponsam te sponsa uocare:

Emendare meos, quos nouit fama, libellos

Et tibi permittis felicis carpere nugas,-

Has, inquam, nugas, quibus aurem aduertere totam

Non aspernantur proceres urbisque forique,

10

Quas et perpetui dignantur scrinia Sili

Et repetit totiens facundo Regulus ore,

Quique uidet propius magni certamina Circi

Laudat Auentinae uicinus Sura Dianae,

Ipse etiam tanto dominus sub pondere rerum

15

Non dedignatur bis terque reuoluere Caesar.

Sed tibi plus mentis, tibi cor limante Minerua

Acrius et tenues finxerunt pectus Athenae.

Ne ualeam, si non multo sapit altius illud,

Quod cum panticibus laxis et cum pede grandi

20

Et rubro pulmone uetus nasisque timendum

Omnia crudelis lanius per compita portat.

Audes praeterea, quos nullus nouerit, in me

Scribere uersiculos miseras et perdere chartas.

At si quid nostrae tibi bilis inusserit ardor,

25

Viuet et haerebit totoque legetur in orbe

Stigmata nec uafra delebit Cinnamus arte.

Sed miserere tui rabido nec perditus ore

Fumantem uiui nasum temptaueris ursi.

Sit placidus licet et lambat digitosque manusque,

30

Si dolor et bilis, si iusta coegerit ira,

Vrsus erit: uacua dentes in pelle fatiges

Et tacitam quaeras, quam possis rodere, carnem.

3

Hirsuta T β γ Cfr. Verg. ecl. 7, 53 stant et iuniperi et castaneae hirsutae; Ou. met. X 103; Culex 138; Petron. frg. 33, 2; AL 715, 4

hirsuto Ker 1950 p. 12 sq., SB. Cfr. VII 58, 7 sq. quaere aliquem Curios semper Fabiosque loquentem / hirsutum et dura rusticitate trucem