Dum nos blanda tenent lasciui stagna Lucrini
Et quae pumiceis fontibus antra calent,
Tu colis Argei regnum, Faustine, coloni,
Quo te bis decimus ducit ab urbe lapis.
5
Horrida sed feruent Nemeaei pectora monstri,
Nec satis est Baias igne calere suo.
Ergo sacri fontes et litora grata ualete,
Nympharum pariter Nereidumque domus.
Herculeos colles gelida uos uincite bruma,
10
Nunc Tiburtinis cedite frigoribus.