Nescit, crede mihi, quid sint epigrammata, Flacce,
Qui tantum lusus illa iocosque uocat.
Ille magis ludit qui scribit prandia saeui
Tereos aut cenam, crude Thyesta, tuam,
5
Aut puero liquidas aptantem Daedalon alas
Pascentem Siculas aut Polyphemon ouis.
A nostris procul est omnis uesica libellis
Musa nec insano syrmate nostra tumet.
"Illa tamen laudant omnes, mirantur, adorant".
10
Confiteor: laudant illa sed ista legunt.