Saturnalia diuitem Sabellum
Fecerunt: merito tumet Sabellus,
Nec quemquam putat esse praedicatque
Inter causidicos beatiorem.
5
Hos fastus animosque dat Sabello
Farris semodius fabaeque fresae,
Et turis piperisque tres selibrae,
Et Lucanica uentre cum Falisco,
Et nigri Syra defruti lagona,
10
Et ficus Libyca gelata testa
Cum bulbis cocleisque caseoque.
Piceno quoque uenit a cliente
Parcae cistula non capax oliuae,
Et crasso figuli polita caelo
15
Septenaria synthesis Sagunti,
Hispanae luteum rotae toreuma,
Et lato uariata mappa clauo.
Saturnalia fructuosiora
Annis non habuit decem Sabellus.
5
fastus animosque β
faustus animusque γ