Hanc tibi Sequanicae pinguem textricis alumnam,
Quae Lacedaemonium barbara nomen habet,
Sordida, sed gelido non aspernanda Decembri
Dona, peregrinam mittimus endromida:
5
Seu lentum ceroma teris tepidumue trigona
Siue harpasta manu puluerulenta rapis,
Plumea seu laxi partiris pondera follis
Siue leuem cursu uincere quaeris Athan
Ne madidos intret penetrabile frigus in artus
10
Neue grauis subita te premat Iris aqua.
Ridebis uentos hoc munere tectus et imbris