Martialis epigrammata 3, 63

Testo base di riferimento: A. Fusi, 2006

Cura dell'edizione digitale: A. Fusi, 2007

Altre sezioni


Cotile, bellus homo es: dicunt hoc, Cotile, multi.

     Audio: sed quid sit, dic mihi, bellus homo.

"Bellus homo est, flexos qui digerit ordine crines,

      Balsama qui semper, cinnama semper olet;

5

Cantica qui Nili, qui Gaditana susurrat,

     Qui mouet in uarios bracchia uulsa modos;

Inter femineas tota qui luce cathedras

      Desidet atque aliqua semper in aure sonat,

Qui legit hinc illinc missas scribitque tabellas

10

      Pallia uicini qui refugit cubiti;

Qui scit quam quis amet, qui per conuiuia currit,

     Hirpini ueteres qui bene nouit auos".

Quid narras? hoc est, hoc est homo, Cotile, bellus?

     Res pertricosa est, Cotile, bellus homo.

2

bellus homo. dist. Friedlaender

bellus homo? edd. pler.