Vis fieri liber? mentiris, Maxime, non uis:
Sed fieri si uis, hac ratione potes.
Liber eris, cenare foris si, Maxime, nolis,
Veientana tuam si domat uua sitim,
5
Si ridere potes miseri chrysendeta Cinnae,
Contentus nostra si potes esse toga,
Si plebeia Venus gemino tibi uincitur asse,
Si tua non rectus tecta subire potes.
Haec tibi si uis est, si mentis tanta potestas,
10
Liberior Partho uiuere rege potes.