"Ride si sapis, o puella, ride"
Paelignus, puto, dixerat poeta.
Sed non dixerat omnibus puellis.
Verum ut dixerit omnibus puellis,
5
Non dixit tibi: tu puella non es,
Et tres sunt tibi, Maximina, dentes,
Sed plane piceique buxeique.
Quare si speculo mihique credis,
Debes non aliter timere risum,
10
Quam uentum Spanius manumque Priscus,
Quam cretata timet Fabulla nimbum,
Cerussata timet Sabella solem.
Vultus indue tu magis seueros,
Quam coniunx Priami nurusque maior.
15
Mimos ridiculi Philistionis
Et conuiuia nequiora uita
Et quidquid lepida procacitate
Laxat perspicuo labella risu.
Te maestae decet adsidere matri
20
Lugentique uirum piumue fratrem,
Et tantum tragicis uacare Musis.
At tu iudicium secuta nostrum
Plora, si sapis, o puella, plora.