Vade salutatum pro me, liber: ire iuberis
Ad Proculi nitidos, officiose, lares.
Quaeris iter? dicam. uicinum Castora canae
Transibis Vestae uirgineamque domum;
5
Inde sacro ueneranda petes Palatia cliuo,
Plurima qua summi fulget imago ducis.
Nec te detineat miri radiata colossi
Quae Rhodium moles uincere gaudet opus.
Flecte uias hac qua madidi sunt tecta Lyaei
10
Et Cybeles picto stat Corybante tholus.
Protinus a laeua clari tibi fronte Penates
Atriaque excelsae sunt adeunda domus.
Hanc pete: ne metuas fastus limenque superbum:
Nulla magis toto ianua poste patet,
15
Nec propior quam Phoebus amet doctaeque sorores.
Si dicet "quare non tamen ipse uenit?"
Sic licet excuses "quia qualiacumque leguntur
Ista, salutator scribere non potuit".