Vir Celtiberis non tacende gentibus
Nostraeque laus Hispaniae,
Videbis altam, Liciniane, Bilbilin,
Equis et armis nobilem,
5
Senemque Caium niuibus, et fractis sacrum
Vadaueronem montibus,
Et delicati dulce Boterdi nemus,
Pomona quod felix amat.
Tepidi natabis lene Congedi uadum
10
Mollesque Nympharum lacus,
Quibus remissum corpus astringes breui
Salone, qui ferrum gelat.
Praestabit illic ipsa figendas prope
Voberca prandenti feras.
15
Aestus serenos aureo franges Tago
Obscurus umbris arborum;
Auidam rigens Derceita placabit sitim
Et Nutha, quae uincit niues.
At cum December canus et bruma impotens
20
Aquilone rauco mugiet,
Aprica repetes Tarraconis litora
Tuamque Laletaniam.
Ibi illigatas mollibus dammas plagis
Mactabis et uernas apros
25
Leporemque forti callidum rumpes equo,
Ceruos relinques uilico.
Vicina in ipsum silua descendet focum
Infante cinctum sordido;
Vocabitur uenator et ueniet tibi
30
Conuiua clamatus prope;
Lunata nusquam pellis et nusquam toga
Olidaeque uestes murice;
Procul horridus Liburnus et querulus cliens,
Imperia uiduarum procul;
35
Non rumpet altum pallidus somnum reus,
Sed mane totum dormies.
Mereatur alius grande et insanum sophos:
Miserere tu felicium
Veroque fruere non superbus gaudio,
40
Dum Sura laudatur tuus.
Non impudenter uita quod relicum est petit,
Cum fama quod satis est habet.
5
Senemque γ Cfr. IV 55, 2 Caium veterem; AL 578, 4 Sithonia glacialis hiems niue cana senescit
sterilemque β def. Helm 1926 coll. VIII 68, 10 sterilis ... hiems