Incustoditis et apertis, Lesbia, semper
Liminibus peccas nec tua furta tegis,
Et plus spectator quam te delectat adulter
Nec sunt grata tibi gaudia si qua latent.
5
At meretrix abigit testem ueloque seraque
Raraque Submemmi fornice rima patet.
A Chione saltem uel ab Iade disce pudorem:
Abscondunt spurcas et monumenta lupas.
Numquid dura tibi nimium censura uidetur?
10
Deprendi ueto te, Lesbia, non futui.