Cum traheret Priscus, traheret certamina Verus,
Esset et aequalis Mars utriusque diu,
Missio saepe uiris magno clamore petita est;
Sed Caesar legi paruit ipse suae:-
5
Lex erat, ad digitum posita concurrere parma:-
Quod licuit, lances donaque saepe dedit.
Inuentus tamen est finis discriminis aequi:
Pugnauere pares, succubuere pares.
Misit utrique rudes et palmas Caesar utrique:
10
Hoc pretium uirtus ingeniosa tulit.
Contigit hoc nullo nisi te sub principe, Caesar:
Cum duo pugnarent, uictor uterque fuit.