Qualiter in Scythica religatus rupe Prometheus
Assiduam nimio pectore pauit auem,
Nuda Caledonio sic uiscera praebuit urso
Non falsa pendens in cruce Laureolus.
5
Viuebant laceri membris stillantibus artus
Inque omni nusquam corpore corpus erat.
Denique supplicium dignum tulit: ille parentis
Vel domini iugulum foderat ense nocens,
Templa uel arcano demens spoliauerat auro,
10
Subdiderat saeuas uel tibi, Roma, faces.
Vicerat antiquae sceleratus crimina famae,
In quo, quae fuerat fabula, poena fuit.