Me miserum! neque enim uerbis sollemnibus ulla
Incipiam nec Castaliae uocalibus undis
Inuisus Phoeboque grauis. quae uestra, sorores,
Orgia, Pieriae, quas incestauimus aras?
5
Dicite, post poenam liceat commissa fateri.
Numquid inaccesso posui uestigia luco?
Num uetito de fonte bibi? quae culpa, quis error,
Quem luimus tantis? morientibus ecce lacertis
Viscera nostra tenens animamque auellitur infans,
10
Non de stirpe quidem nec qui mea nomina ferret
Oraque; non fueram genitor, sed cernite fletus
Liuentesque genas et credite planctibus orbi:
Orbus ego. huc patres et aperto pectore matres
Conueniant; cineremque oculis et crimina ferte!
15
Si qua sub uberibus plenis ad funera natos
Ipsa gradu labente tulit madidumque cecidit
Pectus et ardentes restinxit lacte papillas;
Quisquis adhuc tenerae signatum flore iuuentae
Immersit cineri iuuenem primaque iacentis
20
Serpere crudelis uidit lanugine flammas,
Adsit et alterno mecum clamore fatiscat:
Vincetur lacrimis, et te, Natura, pudebit.
Tanta mihi feritas, tanta est insania luctus.
Hoc quoque dum meditor, ter dena luce peracta,
25
Acclinis tumulo et planctus in carmina uerto
Discordesque modos et singultantia uerba
Molior, orsa lyrae uis est atque ira tacendi
Impatiens, sed nec solitae mihi uertice laurus
Nec fronti uittatus honos. en taxea marcet
30
Silua comis, hilaresque hederas plorata cupressus
Excludit ramis; nec eburno pollice chordas
Pulso, sed incertam digitis errantibus amens
Scindo chelyn. iuuat, heu!, iuuat illaudabile carmen
Fundere et incompte miserum laudare dolorem.
35
Sic merui? sic me cantuque habituque nefastum
Aspiciant superi? pudeat Thebasque nouumque
Aeaciden: nil iam placidum manabit ab ore.
Ille ego qui (quotiens!) blande matrumque patrumque
Vulnera, qui uiduos potui mulcere dolores,
40
Ille ego lugentum mitis solator, acerbis
Auditus tumulis et descendentibus umbris,
Deficio medicasque manus fomentaque quaero
Vulneribus, sed si ulla, meis. nunc tempus, amici,
Quorum ego manantes oculos et saucia tersi
45
Pectora: reddite opem, saeuas exsoluite gratis.
Nimirum cum uestra domus ego funera maestus
Increpitans: "qui damna doles aliena, repone
Infelix lacrimas et tristia carmina serua."
Verum erat: absumptae uires et copia fandi
50
Nulla mihi, dignumque nihil mens fulmine tanto
Repperit: inferior uox omnis et omnia sordent
Verba. ignosce, puer: tu me caligine mersum
Obruis. a! durus, uiso si uulnere carae
Coniugis inuenit caneret quod Thracius Orpheus
55
Dulce sibi, si busta Lini complexus Apollo
Non tacuit. nimius fortasse auidusque doloris
Dicor et in lacrimis iustum excessisse pudorem!
Quisnam autem gemitus lamentaque nostra rependis?
O nimium felix, nimium crudelis et expers
60
Imperii, Fortuna, tui, qui dicere legem
Fletibus aut fines audet censere dolendi!
Incitat, heu!, planctus; potius fugientia ripas
Flumina detineas rapidis aut ignibus obstes,
Quam miseros lugere uetes. tamen ille seuerus,
65
Quisquis is est, nostrae cognoscat uulnera causae.
Non ego mercatus Pharia de puppe loquaces
Delicias doctumque sui conuicia Nili
Infantem, lingua nimium salibusque proteruum,
Dilexi: meus ille, meus. tellure cadentem
70
Excepi atque unctum genitali carmine foui
Poscentemque nouas tremulis ululatibus auras
Inserui uitae. quid plus tribuere parentes?
Quin alios ortus libertatemque sub ipsis
Vberibus tibi, parue, dedi cum munera nostra
75
Ridebas ingratus adhuc. properauerit ille,
Sed merito properabat, amor, ne perderet ullum
Libertas tam parua diem. nonne horridus ipsos
Inuidia superos iniustaque Tartara pulsem?
Nonne gemam te, care puer? quo sospite natos
80
Non cupii, primo gemitum qui protinus ortu
Implicuit fixitque mihi, cui uerba sonosque
Monstraui questusque et uulnera caeca resoluens,
Reptantemque solo demissus ad oscula nostra
Erexi, blandoque sinu iam iamque cadentes
85
Exsopire genas dulcesque accersere somnos.
Cui nomen uox prima meum ludusque tenello
Risus, et a nostro ueniebant gaudia uultu.