Est sane iocus iste, quod libellum

Misisti mihi, Grype, pro libello.

Vrbanum tamen hoc potest uideri

Si post hoc aliquid mihi remittas;

5

Nam si ludere, Grype, perseueras,

Non ludis. Licet, ecce, computemus.

Noster purpureus nouusque charta

Et binis decoratus umbilicis

Praeter me mihi constitit decussis;

10

Tu rosum tineis situque putrem,

Quales aut Libycis madent oliuis

Aut tus Niliacum piperue seruant

Aut Byzantiacos cocunt lacertos,

Nec saltem tua dicta continentem

15

Quae trino iuuenis foro tonabas

Aut centum prope iudices, priusquam

Te Germanicus arbitrum sequenti

Annonae dedit omniumque late

Praefecit stationibus uiarum,

20

Sed Bruti senis oscitationes

De capsa miseri libellionis,

Emptum plus minus asse Gaiano,

Donas. Vsque adeone defuerunt

Caesis pillea suta de lacernis

25

Vel mantelia luridaeue mappae,

Chartae Thebaicaeue Caricaeue?

Nusquam turbine conditus ruenti

Prunorum globus atque cottanorum?

Non enlychnia sicca, non replictae

30

Bulborum tunicae? nec oua tantum

Nec lenes halicae nec asperum far?

Nusquam Cinyphiis uagata campis

Curuarum domus uda cochlearum?

Non lardum graue debilisue perna?

35

Non Lucanica, non graues Falisci,

Non sal oxyporumue caseusue

Aut panes uiridantis aphronitri

Vel passum psithiis suis recoctum

Dulci defruta uel lutosa caeno?

40

Quantum uel dare cereos olentes,

Cultellum tenuesue codicillos?

Ollares, rogo, non licebat uuas,

Cumano patinas in orbe tortas

Aut unam dare synthesin (quid horres?)

45

Alborum calicum atque caccaborum?

Sed certa uelut aequus in statera

Nil mutas, sed idem mihi rependis.

Quid si cum bene mane semicrudus

Inlatam tibi dixero salutem,

50

Et tu me uicibus domi salutes?

Aut cum me dape iuueris opima,

Exspectes similes et ipse cenas?

Irascor tibi, Grype. sed ualebis;

Tantum ne mihi, quo soles lepore,

55

Et nunc hendecasyllabos remittas.