Regia Sidoniae conuiuia laudat Elissae
Qui magnum Aenean Laurentibus intulit aruis,
Alcinoique dapes mansuro carmine monstrat,
Aequore qui multo reducem consumpsit Vlixem:
5
Ast ego cui sacrae Caesar noua gaudia cenae
Nunc primum dominaque dedit non surgere mensa,
Qua celebrem mea uota lyra, quas soluere grates
Sufficiam? non, si pariter mihi uertice laeto
Nectat odoratas et Smyrna et Mantua lauros,
10
Digna loquar. mediis uideor discumbere in astris
Cum Ioue et Iliaca porrectum sumere dextra
Immortale merum. steriles transmisimus annos:
Haec aeui mihi prima dies, hic limina uitae.
Tene ego, regnator terrarum orbisque subacti
15
Magne parens, te, spes hominum, te, cura deorum,
Cerno iacens? datur haec iuxta, datur ora tueri
Vina inter mensasque, et non adsurgere fas est?
Tectum augustum, ingens, non centum insigne columnis,
Sed quantae superos caelumque Atlante remisso
20
Sustentare queant. stupet hoc uicina Tonantis
Regia, teque pari laetantur sede locatum
Numina. nec magnum properes escendere caelum:
Tanta patet moles effusaeque impetus aulae
Liberior, campi multumque amplexus operti
25
Aetheros, et tantum domino minor; ille penatis
Implet et ingenti genio iuuat. aemulus illic
Mons Libys Iliacusque nitent et multa Syene
Et Chios et glaucae certantia Doridi saxa
Lunaque portandis tantum suffecta columnis.
30
Longa supra species: fessis uix culmina prendas
Visibus auratique putes laquearia caeli.
Hic cum Romuleos proceres trabeataque Caesar
Agmina mille simul iussit discumbere mensis,
Ipsa sinus accincta Ceres Bacchusque laborat
35
Sufficere. Aetherii felix sic orbita fluxit
Triptolemi; sic uitifero sub palmite nudos
Vmbrauit colles et sobria rura Lyaeus.
Sed mihi non epulas Indisque innixa columnis
Robora Maurorum famulasque ex ordine turmas,
40
Ipsum, ipsum cupido tantum spectare uacauit
Tranquillum uultus et maiestate serena
Mulcentem radios summittentemque modeste
Fortunae uexilla suae; tamen ore nitebat
Dissimulatus honos. talem quoque barbarus hostis
45
Posset et ignotae conspectum agnoscere gentes.
Non aliter gelida Rhodopes in ualle recumbit
Dimissis Gradiuus equis; sic lubrica ponit
Membra Therapnaea resolutus gymnade Pollux,
Sic iacet ad Gangen Indis ululantibus Euhan,
50
Sic grauis Alcides post horrida iussa reuersus
Gaudebat strato latus acclinare leoni.
Parua loquor necdum aequo tuos, Germanice, uultus:
Talis, ubi Oceani finem mensasque reuisit
Aethiopum sacro diffusus nectare uultus
55
Dux superum secreta iubet dare carmina Musas
Et Pallenaeos Phoebum laudare triumphos.
Di tibi (namque animas saepe exaudire minores
Dicuntur) patriae bis terque exire senectae
Annuerint fines. rata numina miseris astris,
60
Templaque des habitesque domos! saepe annua pandas
Limina, saepe nouo Ianum lictore salutes,
Saepe coronatis iteres quinquennia lustris!
Qua mihi felices epulas mensaeque dedisti
Sacra tuae, talis longo post tempore uenit
65
Lux mihi, Troianae qualis sub collibus Albae,
Cum modo Germanas acies modo Daca sonantem
Proelia Palladio tua me manus induit auro.