Statius siluae 3, 2

Altre sezioni


Di quibus audaces amor est seruare carinas

Saeuaque uentosi mulcere pericula ponti,

Sternite molle fretum placidumque aduertite uotis

Concilium, et lenis non obstrepat unda precanti:

5

Grande tuo rarumque damus, Neptune, profundo

Depositum. Iuuenis dubio committitur alto

Maecius atque animae partem super aequora nostrae

Maiorem transferre parat. Proferte benigna

Sidera et antemnae gemino considite cornu,

10

Oebalii fratres; uobis pontusque polusque

Luceat; Iliacae longe nimbosa sororis

Astra fugate, precor, totoque excludite caelo.

Vos quoque caeruleum ponti, Nereides, agmen,

Quis honor et regni cessit fortuna secundi

15

(Dicere quae magni fas sit mihi sidera ponti),

Surgite de uitreis spumosae Doridos antris

Baianosque sinus et feta tepentibus undis

Litora tranquillo certatim ambite natatu,

Quaerentes ubi celsa ratis, quam scandere gaudet

20

Nobilis Ausoniae Celer armipotentis alumnus.

Nec quaerenda diu; modo nam trans aequora terris

Prima Dicarcheis Pharium grauis intulit annum,

Prima salutauit Capreas et margine dextro

Sparsit Tyrrhenae Mareotica uina Mineruae.

25

Huius utrumque latus molli praecingite gyro,

Partitaeque uices uos stuppea tendite mali

Vincula, uos summis adnectite sipara uelis,

Vos zephyris aperite sinus; pars transtra reponat,

Pars demittat aquis curuae moderamina puppis;

30

Sint quibus exploret primos grauis arte molorchos,

Quaeque secuturam religent post terga phaselon

Vncaque summersae penitus retinacula uellant;

Temperet haec aestus pelagusque inclinet ad ortus:

Officio careat glaucarum nulla sororum.

35

Hinc multo Proteus geminoque hinc corpore Triton

Praenatet, et subitis qui perdidit inguina monstris

Glaucus, adhuc patriis quotiens allabitur oris

Litoream blanda feriens Anthedona cauda.

Tu tamen ante omnes diua cum matre, Palaemon,

40

Annue, si uestras amor est mihi pandere Thebas,

Nec cano degeneri Phoebeum Amphiona plectro.

Et pater Aeolio frangit qui carcere uentos,

Cui uarii flatus omnisque per aequora mundi

Spiritus atque hiemes nimbosaque nubila parent,

45

Artius obiecto Borean Eurumque Notumque

Monte premat: soli Zephyro sit copia caeli,

Solus agat puppes summasque supernatet undas

Assiduus pelago; donec tua turbine nullo

Laesa Paraetoniis assignet carbasa ripis.

50

Audimur. Vocat ipse ratem nautasque morantes

Increpat. Ecce meum timido iam frigore pectus

Labitur et nequeo, quamuis mouet ominis horror,

Claudere suspensos oculorum in margine fletus.

Iamque ratem terris diuisit fune soluto

55

Nauita et angustum deiecit in aequora pontem.

Saeuus et e puppi longo clamore magister

Dissipat amplexus atque oscula fida reuellit,

Nec longum cara licet in ceruice morari.

Attamen in terras e plebe nouissimus omni

60

Ibo nec egrediar nisi iam currente carina.

Quis rude et abscissum miseris animantibus aequor

Fecit iter solidaeque pios telluris alumnos

Expulit in fluctus pelagoque immisit hianti

Audax ingenii? Nec enim temeraria uirtus

65

Illa magis, summae gelidum quae Pelion Ossae

Iunxit anhelantemque iugis bis pressit Olympum.

Vsque adeone parum lentas transire paludes

Stagnaque et angustos summittere pontibus amnes?

Imus in abruptum gentilesque undique terras

70

Exigua fugimus clausi trabe et aere nudo.

Inde furor uentis indignataeque procellae

Et caeli fremitus et fulmina plura Tonanti.

Ante rates pigro torpebant aequora somno,

Nec spumare Thetis nec spargere nubila fluctus

75

Audebant. Visis tumuerunt puppibus undae,

Inque hominem surrexit hiems. Tunc nubila Plias

Oleniumque pecus, solito tunc peior Orion.

Iusta queror. Fugit ecce uagas ratis acta per undas

Paulatim minor et longe seruantia uincit

80

Lumina, tot gracili ligno complexa timores,

Quaeque super reliquos te, nostri pignus amoris,

Portat dura, Celer. Quos nunc ego pectore somnos

Quosue queam perferre dies? Quis cuncta pauenti

Nuntius an facili te praetermiserit unda

85

Lucani rabida ora maris, num torta Charybdis

Fluctuet aut Siculi populatrix uirgo profundi,

Quos tibi currenti praeceps gerat Hadria mores,

Quae pax Carpathio, quali te subuehat aura

Doris Agenorei furtis blandita iuuenci?

90

Sed merui questus. Quid enim te castra petente

Non uel ad ignotos ibam comes impiger Indos

Cimmeriumque chaos? Starem prope bellica regis

Signa mei, seu tela manu seu frena teneres,

Armatis seu iura dares; operumque tuorum

95

Etsi non socius, certe mirator adessem.

Si quondam magno Phoenix reuerendus Achilli

Litus ad Iliacum Thymbraeaque Pergama uenit

Imbellis tumidoque nihil iuratus Atridae,

Cur nobis ignauus amor? Sed pectore fido

100

Numquam abero longisque sequar tua carbasa uotis.

Isi, Phoroneis olim stabulata sub antris,

Nunc regina Phari numenque Orientis anheli,

Excipe multisono puppem Mareotida sistro

Ac iuuenem egregium, Latius cui ductor Eoa

105

Signa Palaestinasque dedit frenare cohortes,

Ipsa manu placida per limina festa sacrosque

Duc portus urbesque tuas. Te praeside noscat,

Vnde paludosi fecunda licentia Nili,

Cur uada desidant et ripa coerceat undas

110

Cecropio stagnata luto, cur inuida Memphis,

Curue Therapnaei lasciuiat ora Canopi,

Cur seruet Pharias Lethaeus ianitor aras,

Vilia cur magnos aequent animalia diuos;

Quae sibi praesternat uiuax altaria Phoenix,

115

Quos dignetur agros aut quo se gurgite Nili

Mergat adoratus trepidis pastoribus Apis.

Duc et ad Emathios manes, ubi belliger urbis

Conditor Hyblaeo perfusus nectare durat,

Anguiferamque domum, blando qua mersa ueneno

120

Actias Ausonias fugit Cleopatra catenas.

Vsque et in Assyrias sedes mandataque castra

Prosequere et Marti iuuenem, dea, trade Latino.

Nec nouus hospes erit: puer his sudauit in aruis

Notus adhuc tantum maioris lumine claui,

125

Iam tamen et turmas facili praeuertere gyro

Fortis et Eoas iaculo damnare sagittas.

Ergo erit illa dies, qua te maiora daturus

Caesar ab emerito iubeat discedere bello,

At nos hoc iterum stantes in litore uastos

130

Cernemus fluctus aliasque rogabimus auras.

O tum quantus ego aut quanta uotiua mouebo

Plectra lyra, cum me magna ceruice ligatum

Attolles umeris atque in mea pectora primum

Incumbes e puppe nouus seruataque reddes

135

Colloquia inque uicem medios narrabimus annos:

Tu rapidum Euphraten et regia Bactra sacrasque

Antiquae Babylonis opes et Zeugma, Latinae

Pacis iter, qua dulce nemus florentis Idumes,

Qua pretiosa Tyros rubeat, quo purpura suco

140

Sidoniis iterata cadis, ubi germine primum

Candida felices sudent opobalsama uirgae;

Ast ego, deuictis dederim quae busta Pelasgis

Quaeue laboratas claudat mihi pagina Thebas.