CLE 01109 = Cholodniak 00875 = CIL 06, 21521 = CIL 06, 34137 = CLENuovo p 119-120

Quum praematura raptum mihi morte Nepotem

      Flerem Parcarum putria fila querens

Et gemerem tristi damnatam sorte iuuentam

      Versaretque nouus uiscera tota dolor,

5

Me desolatum, me desertum ac spoliatum

      Clamarem largis saxa mouens lacrimis,

Exacta prope nocte suos quum Lucifer ignes

      Spargeret et uolucri roscidus iret equo,

Vidi sidereo radiantem lumine formam

10

      Aethere delabi. non fuit illa quies,

Sed uerus iuueni color et sonus, at status ipse

      Maior erat nota corporis effigie.

Ardentis oculorum orbes umerosq(ue) nitentis

      Ostendens roseo reddidit ore sonos:

15

'Affinis memorande, quid o me ad sidera caeli

      Ablatum quereris? desine flere deum,

Ne pietas ignara superna sede receptum

      Lugeat et laedat numina tristitia.

Non ego Tartareas penetrabo tristis ad undas,

20

      Non Acheronteis transuehar umbra uadis,

Non ego caeruleam remo pulsabo carinam

      Nec te terribilem fronte timebo, Charon,

Nec Minos mihi iura dabit grandaeuus et atris

      Non errabo locis nec cohibebor aquis.

25

Surge, refer matri ne me noctesque diesque

      Defleat ut maerens Attica mater Ityn.

Nam me sancta Venus sedes non nosse silentum

      Iussit et in caeli lucida templa tulit'.

Erigor et gelidos horror perfuderat artus,

30

      Spirabat suaui tinctus odore locus.

Die Nepos, seu tu turba stipatus Amorum

      Laetus Adoneis lusibus insereris,

Seu grege Pieridum gaudes seu Palladis [arte],

     Omnis caelicolum te chor[u]s exc[ipiet].

35

Si libeat thyrsum grauidis aptare co[rymbis]

     Et uelare comam palmite, Liber [eris].

Pascere si crinem et lauro redimire [manuque]

     Arcum cum pharetra sumere, Ph[oebus eris].

Indueris teretis manicas, Phrygium [decus, Attis]

40

     Non unus Cybeles pectore uiuet a[mor].

Si spumantis equi libeat quatere ora [lupatis],

     Cyllare, formosi membra uehes e[quitis].

Sed quicumque deus, quicumque uocaber[is heros],

     Sit soror et mater, sit puer incolu[mis].

45

Haec dona unguentis et sunt potiora c[orollis],

     Quae non tempus edax, non rapi[t ipse rogus].

33

[arte] suppl. Henzen - De Rossi, Bücheler

34

chor[u]s exc[ipiet] suppl. Henzen - De Rossi, Bücheler

35

co[rymbis] suppl. Henzen - De Rossi, Bücheler

36

[eris] suppl. Henzen - De Rossi, Bücheler

37

[manuque] suppl. Bücheler; [placebit] suppl. Henzen - De Rossi

38

Ph[oebus eris] suppl. Henzen - De Rossi, Bücheler

39

Phrygium [decus, Attis] suppl. Bücheler; Phrygium[que galerum] suppl. Henzen - De Rossi dubit.

40

a[mor] suppl. Bücheler; A[tys] suppl. Henzen - De Rossi

41

[lupatis] suppl. Henzen - De Rossi, Bücheler

42

e[quitis] suppl. Henzen - De Rossi, Bücheler

43

uocaber[is heros] suppl. Henzen - De Rossi, Bücheler

44

incolu[mis] suppl. Henzen - De Rossi, Bücheler

45

c[orollis] suppl. Henzen - De Rossi, Bücheler

46

rapi[t ipse rogus] suppl. Bücheler; rapi[t ...] suppl. Henzen - De Rossi; rapi[t hora uolans] suppl. Cholodniak

Regio I Latium et Campania / Località: Roma
Datazione: 1-100 d.C.

EDCS
EDR
ACE-CIL
TM

 

Testo base di riferimento: CLE 01109

Cura dell'edizione digitale: A. Prontera, 2022

 

Bücheler = F. Bücheler, Carmina Latina Epigraphica, I-II, Lipsiae 1895-1897

Cholodniak = J. Cholodniak, Carmina Sepulcralia Latina, Petropoli 1897

Henzen - De Rossi = G. Henzen, G. B. De Rossi, Corpus Inscriptionum Latinarum (CIL) V 3: Inscriptiones Urbis Romae Latinae, Berolini 1886

Distici elegiaci