23. ad Franciscum

Francisce, insignis de Parmae stirpe coruscans,

      Historiae cultor Castaliique decus,

Ne mihi nulla tuos oblivio tollat amores

      Nunc faciat paucis pagina missa loqui.

5

Pignus amicitiae semper memorabile nostrae

      Mittimus, ut servi sit tibi cura tui.

Quando tuos mores contemplor Apolline dignos

      Quos tibi pro meritis littera sacra dedit,

Dum sol aestivas exercet tardior horas,

10

      Errat et in nigro dum vaga luna polo,

Thespiadum collem cogor conscendere sacrum

      Vngula Gorgonei quem cava fudit equi,

Vt valeam sacris laudes memorare Camenis

      Atque tua Phoebi nectere fronde comam.