3.

Pallens Picena turdis donatur oliva

      Et pingues alias rusticus addit aves;

Tubera vimineo mittit velata canistro

      Et poma Herculeo digna labore peti;

5

Castaneas et quales olim Amaryllis amavit

      Alter et a Tusco stipite missa pira

Et saturas Vmbro iam dudum lacte mariscas

      Malaque quis nomen Punica terra dedit:

Quum sibi non sit avis, teneat nec rustica dona,

10

      Cor Ferabos animum ingeniumque tradit.

Phillyrides curat Phoenicis lumina Chiron,

      Alter quod telo vulnus ab Herculeo:

Vrbinas Princeps, quo non humanior ullus,

      Sanavit vatis munere pauperiem,

15

Quod rapit hora sequens; ast tu, Federice, dedisti:

      Aeternum Ferabos perpetuumque dabit,

Quum tua victuris committet nomina chartis:

      Non minuent laudes saecula longa tuas.