41. ad Iulianum

Cum tu sis mihi quod Paris Politi,

Quod caesus fuerat Remus Quirino,

Cur te carmine, Iuliane, nostro,

Germane, obticeam tuumque nomen

5

Nostris nec semel inseram libellis?

Vis dicam? Proprio nitore fulges,

Et cum sat faciant tuae Camenae

Ne totus pereas, meas rogare

Musas desine, quae nihil perenne

10

Possunt efficere aut beare quemquam,

Nec possent Culicem Maronianum

Angusto revocare de sepulcro.