Philippus Beroaldus in cupidinem

Panthia me docuit qui sint in amore dolores:

      Affectus, curae, gaudia, damna, doli.

Nunc scio quas leges, quae iura aut dogmata saevus

      Iussit amor. Scripsi singula et edidici.

5

Quae spes quive timor, quod bellum, foedera, quae pax

      Indutiae fiant atque inimicitiae.

Nunc scio quanta gerat secum mens proelia amantum,

      Quantaque mobilitas dissidiumque premat.

Hoc velit, hoc nolit, cupiat quod spreverat ante:

10

      Fluctuat ut glauci fluctuat unda sali.

Vt mens infelix alieno in corpore vivat

      Vtque animus dominae migret in hospitium.

Nunc scio quam largi sunt fletus, utque medullis

      Ossibus et venis fervida flamma latet.

15

Vita aerumnosa est, mors est infamis amantum,

      O felix quisquis talia non pateris.

O felix Veneri mediam qui porrigis unguem

      Et rides arcus, spicula, tela, faces.