41. IN EORVM OBITVM, QVI PRO PATRIA CECIDERANT,
EX GRAECO

Qui propriae quondam patriae peperere salutem

      Vlti hostes valido comminus ense feros,

Dum pugnant coeuntque simul virtusque pudorque,

      Effudere animas pectore quisque suas,

5

Graecia ne magnis olim parere tyrannis

      Disceret, ac foede regna superba pati.

Materno hos Tellus gremio complectitur atque hac

      Iupiter esse omnes conditione iubet.

Nil peccare Deum est eventuque omnia fausto

10

      Perficere: haud homini fata cavere datum.