12. AD MARIVM VRSINVM DE CICONIA INTEREMPTA

Vnguibus et duro dum forte ciconia rostro

      Versantem colubrum lubrica terga rapit,

Percutitur bacca, media quam ferrea flamma,

      Ceu fulmen, tereti fistula ab ore iacit.

5

Ergo cadit: prodestque nihil coluisse parentem

      Et quod cum dira praelia gente gerit.

Tu vero, qui totum uno certissimus ictu

      Alituum sternis, cum libet, agmen humi,

Quem fugisse nequit manni post terga latentem

10

      Seu mergus, seu sit grus, olor, anser, anas:

Parce pias posthac placidarum in caede ferarum

      Sanguine tam innocuo conscelerare manus.