3. DE XIII ITALORVM CVM XIII GALLIS PVGNA IN
PEVCETIIS EX PROVOCATIONE COMMISSA
Quisquis es, egregiis animum si tangeris ausis,
Perlege magnorum maxima facta ducum.
Hic tres atque decem forti concurrere campo
Ausonios Gallis altus adegit amor,
5
Certantes utros bello Mars claret et utros
Viribus atque animis auctet alatque magis.
Par numerus, paria arma, pares aetatibus, et quos
Pro patria pariter laude perisse iuvet.
Fortuna et virtus litem generosa diremit:
10
Et, quae pars victrix debuit esse, fuit.
Hic stravere Itali iusto in certamine Gallos,
Hic dedit Italiae Gallia victa manus.