Francesco Luisini carmina, 10

Reference basis text: Maria Rosa Gortani, tesi di laurea Università degli studi di Trieste, 1973-74

Editing of the digital edition: Barbara Zlobec


10. ad Franchinum clarissimum ode

Nec flavus Tyberis, nec alma celsis

Templis, inclyta Romuli urbs abire

Parentem tenuit Minutium altas

Trans Alpes, rapidi ad fluenta Rheni

5

Cintosque Oceano ultimo ad Britannos,

Et clarum ad Rhodanum, ferosque Belgas,

Dum insignem roseo Polum galero

Ignotas sequitur comes per urbes,

Vt desiderium optimi sodalis

10

Fers Muti? An Tyberina Nympha, clari

Quae quondam est numeris beata Molzae

Te captum tenet aureis ocellis?

Vt Farnesius inclytus, senatus

Lumen purpurei valet tot inter

15

Illustres animi occupationes?

Nos hic, qua liquidis recurrit antris

Parma, roscidulo pede incitatus

Votivam tibi pascimus iuvencam,

Patronoque triplex caput corona

20

Illi dum ambiat, aureaque fronde

Septem arces vireant beato in aevo,

Et Tybris vehat aureas harenas.