38. de Natali nocte Christi Domini
Nascere sancte puer nocte hac, qua purior unquam
Non fulsit rutilis Lucifer ipse comis.
Te nato occumbit letum, dirumque, malumque,
Pravaque relligio, sollicitusque timor;
5
Te nato nova vita oritur, rectumque, piumque,
Et longo exilio spesque, salusque redit.
Magne puer, quem regna manent terraeque, polique,
Quem manet evicti debita palma Erebi,
Nascere: dumque micat nox haec nitidissima, nunquam
10
Affer ab Eoo litore Phoebe diem.