16. Tinnae votum

Hoc tibi remigium alarum iucunde Favoni

      Affixum salicis cortice Tinna dico:

Quas, niveos artus vitreo dum fonte lavabam,

      Surripui armato nuda puella Deo.

5

Aestus erat: liquidas potatum venerat undas

      Lassus Amor: tota strinxerat arma die,

Atque super virides resupinus straverat herbas

      Languidulus somno membra soluta puer.

Tu cape: sic semper per florea prata vagantem

10

      Te foveat blando Chloris amata sinu.

Fac meus ipse tuam venatu ut fessus Iphalcon

      Sentiat ardenti sidere semper opem.