25. ad Alexandrum Piccolomineum

O si dent mihi caelites, ut, ante

Hora quam veniat suprema, vere

Fiam talis, amice, qualis a te

Pulchro carmine pingor! esse talis

5

Et certe cupio, et laboro: verum

Ad hanc usque diem meo labore

Nihil proficio. Timor, cupido,

Cordis gaudia vana, itemque vani

Dolores magis in dies, et horas

10

Mentem sollicitant misellam: in alto

Sic Notus, Boreasque saeva quondam

Miscent proelia. At ipse fluctuantem

Tranquilla, sapientiae serenans

Cor meum monitis, quibus Lycei

15

Magister nitidi tuum replevit

Ob id pectus, ut ipse mente sana

Aegrotis animis queas mederi.