5. de se aegrotante

Ergo adeo coeptum peraget Mors impia cursum,

      Vt post eversae tristia fata domus,

Me quoque surripiat primo vix flore iuventae?

      Et nostra exiguus iam tegat ossa lapis?

5

Di, quorum auspicio communes hausimus auras,

      Parcite nunc vitae rumpere fila meae:

Parcite, si vestros suspexi semper honores,

      Si nullo infecta est candida mens scelere.

Non prius ac caeli cursum confecit, Ibero

10

      Tingit anhelantes gurgite Phoebus equos:

At nunc perpetuam nobis Mors pallida noctem

      Portat, et infernos cogit adire lacus.

Et nondum est rugis facies mihi languida, nec dum

      Infecit nigras alba senecta comas.

15

Sic rosa vix laetum calathi pandebat honorem,

      Cum cadit, et rutilo murice pingit humum.

Iane pater, nostrae quondam spes una iuventae,

      Iam condes manibus lumina nostra tuis:

Iam me postremo tumuli donabis honore;

20

      Et cupies tantis non superesse malis.

Ast ego secura nequidquam mente parabam

      Grandia mox Vmbri dicere facta Ducis.

Vt validas olim bello devicerit urbes;

      Quem tremuit victis pulcher Isaurus aquis:

25

Vt nunc indomitos certet contundere Iberos,

      Italiaeque gravi solvere colla iugo.

Haec heu Persephone, supremi nuntia luctus,

      Vota dedit levibus diripienda Notis.

Saepe salutifero morbum depellere succo

30

      Tentavi: at nulla cesserat arte dolor.

Saepe deum supplex clamavi numina: sed non

      Audierunt nostras numina surda preces.

Quod si tanta sitis, nostrae si tanta cupido est

      Mortis, et effugii spes mihi nulla manet;

35

Ah liceat saltem Elysios invisere campos,

      Et fortunatae regna beata plagae;

Hic ubi cum molli Nemesis formosa Tibullo

      Ludit; et est vati Lesbia iuncta suo.

Et mihi, qualis erit teneris comitata puellis,

40

      Occurret celeri candida Lygda pede:

Et dulces dabit amplexus, et basia iunget,

      Iunget et optati gaudia coniugii.