56. ad Blosium Palladium
Qualis susurrus arboris, cum florido
Iam vere ludit aura primis frondibus:
Vesanientis quale per Caniculae
Aestum iacere in discolore gramine,
5
Sub umbra amoena, fontis ad lympham sacri;
Tales mihi, poeta iucundissime,
Lusus tui, quibus Turundam carmine
Tam bello, amabili, et faceto concinis;
Vt illa carior Catulli passere
10
Iam sit mihi, sive est quid illo carius.