18. ad musam de Philippo Obermairo

Collis Aonii puella cultrix,

Vna ex virginibus novem tenellis,

Quam nec bella cruenta, nec labores

Solis dicere, sed puellularum

5

Amores, querimonias, iocosque

Lascivis elegis iuvat referre;

Hanc myrtum tibi dedicat PHILIPPVS,

Natus Vindelicis PHILIPPVS oris,

Sed tam cultus, et elegans poeta,

10

Tam dulcis lepidusque, ut Italorum

Nemo sit propior tuo Tibullo.

Hanc ille irrigua fovebit unda,

Hanc perfundet odoribus, tuasque

Laudes assidue sub huius umbra,

15

Molli carmine concinet. Puella

Pulchra, tu iuveni fave, tuaeque

Fac sit deliciae, tuique amores.