60. de Nicolao Maurocaeno sive Morosinaeo
Est mihi ad venetas iter lacunas:
Vt inde omnimoda protervitate
Furer doctiloquum Morosinaeum,
Nostrae praesidium sodalitatis,
5
Nostraeque auspicium iubarque eremi.
Illum subripiam, suaeque matris
Extirpem vetulae sinu licebit,
Quae verbosum, et anile nescio quid
Miscens blandiciis, et udo ocello
10
Stillas callidula eliquans minutas,
Hunc nobis adimit: satis, superque
Morosa est mulier, morosiorque,
Quam quod expediat Morosinaeae.
Quin natum memorat semel sacrorum
15
Oblatum officio? quibus parentum
Impium est pietatem anteferre?
Quare audaculus hunc ego admonere,
Immo liberius volo exprobrare,
Furarique suis Morosinaeis.