Ludovico Ariosto carmina, 20

Reference basis text: M. Santoro, 1989

Editing of the digital edition: Daniela Marrone


20. de catella puellae

Quis solaciolum meum? meos quis

Lusus? quis mea gaudia, heu! catellam,

Herae mnemosynon meae catellam,

Quis, ah, quis misero mihi involavit?

5

Quis, ah, quis malus, improbus, scelestus

Tam bellam mihi tamque blandientem,

Tamque molliculam abstulit catellam?

Furum pessime es omnium malorum

Quisquis candidulam mihi catellam,

10

Herae mnemosynon meae catellam,

Meas delicias, meique amoris

Et desiderii mei levamen,

Nostras praeteriens fores, dolose

Manu sub tunicam rapis sinistra!

15

At di dent mala multa, di deaeque

Dent omnes tibi, quisquis es, sceleste,

Actutum mihi ni meam catellam,

Herae mnemosynon meae, remittis.