1. ad Philiroen

Quid Galliarum navibus aut equis

Paret minatus Carolus, asperi

Furore militis tremendo,

Turribus Ausoniis ruinam;

5

Rursus quid hostis prospiciat sibi,

Me nulla tangat cura, sub arbuto

Iacentem aquae ad murmur cadentis

Dum segetes Corydona flavae

Durum fatigant. Philiroe, meum

10

Si mutuum optas, ut mihi saepius

Dixisti, amorem fac corolla

Purpureo variata flore

Amantis udum circumeat caput,

Quam tu nitenti nexueris manu;

15

Mecumque cespite hoc recumbens

Ad citharam canito suave.