156. de Caelia et Cupidine
Forte videns natum Veneris per prata vagantem
Caelia fronte placens, Caelia crine placens,
"Pone arcum et certemus," ait; "pone arma facesque,
Hic tibi si mecum proelia inire libet."
5
Illi dicit Amor, "si pono haec arma, quid in te
Nudus agam? pugnax tu magis atque potens.
At si bella placent, et stat tibi tanta libido
Certandi, tela hac lege repono mea,
Vt claudas oculos (oculi fulgore perurunt),
10
Vt frenes linguam (lingua diserta necat)."
"Nil horum impediet" pulchra "haec certamina," fatur Caelia,
"Claudo libens lumina, lingua silet."
Non exspectat Amor, sed in aere tollitur alis
Et fugit, exclamans, "sat tua forma potest!"